eksenang sauna

kapag naghuhubad
na ng saplot
ang mga punongkahoy
nagdadagsaan
tone-toneladang
laman
sa kwadradong
painitan.

dilat na dilat
ang mga mata,
abalang-abala
ang mga paa,
ngunit bahagya
ang tawanan,
bulungan,
at usapan.

nakikiramdam
lamang
ang bawat adan
kung kanino niya
idadantay ang pagal
na katawan
at kaluluwang walang
mapagpapahingahan.

tala: unang nalathala sa Dalityapi
noong Marso 2001