18 Dezember 2008

Damhin Natin ang Pasko

Sa tamis ng ating mga ngiti,

Sa galak ng bawat pagbati,

Sa kaswal na mga pag-uusap,

Sa lutong ng mga halakhak,

Sa init ng mga halik at yakap,

Sa tatag ng ating paninindigan,

Sa tibay ng ating pananalig,

Sa halimuyak ng mga bulaklak,

Sa pagsikat ng haring araw

Sa pagpatak ng ulan,

Sa pag-awit ng mga ibon,

Sa pag-uha ng mga sanggol.


Gayon din

Sa pagkunot ng ating mga noo,

Sa lungkot ng bawat pamamaalam,

Sa igting tuwing may pagtutunggali,

Sa hapding hatid ng paghihiwalay,

Sa latay ng bawat pag-aaway,

Sa pagkalagas ng mga dahon sa puno,

Sa ginaw na dulot ng taglamig,

Sa mga gabi ng ating pag-iisa,

Sa pagtulo ng ating mga luha.


tala: unang nalathala sa Dalityapi,
Disyembre 2000

17 Dezember 2008

Diyalogo ng Dalawang Karatula

"Ako ang Daan,
Ang Katotohanan
At ang Buhay."
Pakikipagtalumpati
Ng karatulang Bible Forum
Sa istasyon ng tren.

Sa halos wala pang kalahating
Metro ang layo
Nakanganga tila tumatawa
Ang hamburger ng McDonald's
At nagwika,
"So ein Kaese!"

So ein Kaese literally means what a cheese
but in Swiss-German idiomatic expression
this could be translated as what a nonsense.

16 Dezember 2008

Ang Iyong Pagdating

(kay D)

Tila pamumulaklak
ng isang ligaw na kaktus
sa kalagitnaan ng gabi
ang bigla mong pagdating
sa hardin ng aking damdamin-
nanunuksong pitasin
ang namumukadkad
na labing hitik sa lihim.

12 Dezember 2008

Ilang Tanong kay Omar, Batang Mandirigma

Ano ang nag-udyok sa mura mong isip
Na bitiwan ang baling lapis at krayola
At ipagpalit ito sa mga baril at granada?
Tunog-laruan bang maihahalintulad
Ang kanilang mga putok at pagsabog?
Oyayi bang magpapahimbing
Ang mga ungol at sigaw
Ng mga sugata't pumanaw?
Mas kawili-wili bang humukay
Para sa sala-salansang bangkay
Kaysa maglaro sa labas ng bahay?
Mas matindi ba ang init na dulot
Ng tangan-tangan na mga sandata
Kaysa mga yakap ng balo mong ina?

Omar, paulanan mo man ako ng kasagutan
O ipabatid ang katahimikan sa ating pagitan
Taimtim kong ipanalangin kay Allah
Na siya mo ring kinakausap sa Meskita,
Sana bago utasin ng bala ang iyong hininga
Ay matunton mo nang dahan-dahan ang daan
Palabas sa paikid-ikid na sistema ng karahasan
At masipat man lang kahit panandalian
Ang pagdating ng bagong buwan.

Tala: Napasama sa antolohiyang Ani 36 (Disaster
and Survival Issue) ng Cultural Center of the
Philippines gayundin sa Our Own Voice
Literary Ezine Mindanao Issue, na kapwa nilathala

nito lamang Abril 2011.

11 Dezember 2008

eksenang sauna

kapag naghuhubad
na ng saplot
ang mga punongkahoy
nagdadagsaan
tone-toneladang
laman
sa kwadradong
painitan.

dilat na dilat
ang mga mata,
abalang-abala
ang mga paa,
ngunit bahagya
ang tawanan,
bulungan,
at usapan.

nakikiramdam
lamang
ang bawat adan
kung kanino niya
idadantay ang pagal
na katawan
at kaluluwang walang
mapagpapahingahan.

tala: unang nalathala sa Dalityapi
noong Marso 2001

09 Dezember 2008

Pangarap

Iniwan ko ang kubong ang tanging yama'y
Isang tabinging kalderong madalas kundi man
Saging ay mainit na tubig lamang ang laman.
Kipkip ang tampiping pinuno ng pag-asa
Inilulan ko ang sarili sa isang barkong tumbok
Ay islang susuhay sa hinahangad na buhay.
Ano't bago dumaong sa inaasam na dalampasigan
Hampas ng mga alon sa ami'y gumulantang
Ngayon tulad ng karamihang karga't pasahero
Pangarap ko'y inilubog ng Dagat Pasipiko.

08 Dezember 2008

Taglamig

Tulad nang ipinataw ng taglamig
Sa mga pontanya ng syudad,
Itinigil niya ang pag-agos ng galak
Sa katawan kong sabik sa init-araw.
At kung may gunita mang pangahas
Na dadaloy sa isipa't
Liligwak sa mga labi'y
Sasalukin niya maging
Ang madalang na mga patak
Upang pagkatapos ay papagyeluhin,
Patutulising tila mga estalaktika
At iuumang sa pandamdam.

tala: unang nalathala sa Pinoypoets, Inc.

03 Dezember 2008

Sa Isang Babaeng Balo

Nagsilang ng sanggol ang isang balo,
anim na taon pagkatapos na yumao
ang kanyang asawa. Dahil sa Saudi Arabya
ito nangyari, nahatulan siya ng kamatayan.
SonntagsBlick, Nobyembre 26, 2006


Nakahanda na rin ang iyong hukay
Magmula nang asawa mo'y namatay.

Sa bayan ng lumalagablab na disyerto
Kasumpa-sumpa sa iyong mga kadugo

Ang mamuhay ang mga tulad mo,
Babaeng balo at may supling na tatlo.

Sa araw-araw na pamamalimos
Nagkakaapoy, tahanang naghihikahos;

Naaaninag ang silweta ng pag-iisa,
Nasasalat ang kurba ng pangungulila;

Kaya bawat pangako at pagsuyo'y
Bisita ngayong sa puso'y pinapatuloy.

Nang mahinog sa sinapupunan,
Punla ng panibagong pagmamahalan

Hinarap mo ang nakahandang hukay
Na pamana ng asawa mong namatay.

Tala: unang nalathala sa Our Own Voice
Literary Ezine Mindanao Issue, Abril 2011.

18 November 2008

Postscript kay Juan, Pangunahing Tauhan ng La Mala Educacion

Nang saglit na tumambad
sa kayputing kawalan
ang hubad mong katawan
kawad ng diwa'y napatid,
hibla ng kawili-wiling
kuwento'y nagkabuholbuhol,
at ang pinakamasaklap sa lahat
buntong-hininga kot' pag-aasam
ay walang awang nilagot
ng mga ilaw na sa aki'y nakapalibot.

17 November 2008

Ako, pagpasok ng taglagas

Pagpasok ng taglagas
mga sanga ng puno'y
nagsasabit ng mga dilaw,
kulay dalandan at matitingkad
na pulang banderitas;
na maya't maya'y sumasayaw
sa walang kapagurang
pagtutugtog ng hangin
sa kapanahunang ito,
tila saglit na ipinagdiriwang
ang papalapit na pananahimik
ng buong paligid.

At ako'y
natulad sa mga krokus,
ang makukulay na talulot
ay noon pang tag-araw itiniklop
at sa ilalim ng lupa'y nahimbing,
tinakasan ang pagdating
ng kayhapding hangin.


tala: unang nalathala sa Sangkomunidad
(CCP), Disyembre 2005.

heto ang maikli nilang pagpakilala sa aking akda:
"Pakiramdaman ang nasasaloob ng makatang
tubong-Dabaw na ngayo'y aktibong bahagi ng
pamayanang Pilipino-Suwiso, habang ang kubling
damdaming yao'y sinasalamin ng pamilyar niyang
pagtatala ng mga bagay sa kapaligiran."

16 November 2008

Bisikleta

(sa alaala ng mahal kong Itay)

Sa bayan ng mga tulipan kung saan
Dinala ako ng aking mga talampakan
Nabanaagan kita Itay kasama ang mga
Lumang bisikletang walang enggranahe,
Na kundi man gumagaralgal sa pagtakbo
Ay tahimik lamang na nakasandal
Sa mga rehas na bakal ng mga tulay.
At sa mga sandaling sinasabayan nila
Ang araw-araw kong pagbaktas sa syudad
Hindi ko maawat ang isip na umangkas
Sa pag-aasam na lakbaying muli
Ang mga kalsada ng ating nakalipas,
Na bagama't mabato at liku-liko
Ay narating pa rin nating pareho
Ang lunang may bahaghari sa dulo.

15 November 2008

Gabing Maalwan

(kay R)

Tumugtog ang magarang piyano,
Tumaginting ang mga kopa,
Umandap-andap ang mga kandila,
Uminit ang katad na sofa,
Habang naglayag sa gunita---
Ang mga nakangangalay na paggaod
At paminsan-minsang pagtaob
Ng ating mga pusong mapaglakbay
Sa gitna nang maalon tang panahon.

12 November 2008

Ang Basurero

Binubuhay ako ng mga berde at puting botelya
na natatagpuan ko sa mga bundok ng basura.

Namumuhay ako sa kasalatan dahil may mga
nagpipiyesta sa tamis ng sopdrinks at pait ng alak.

At nabubuhay ako sapagkat kinakailangang
may tagalikom ng kalat sa mundo. Itong mundong

Sagana sa berde at puting botelya. Sa tuwing
nahahalukay ko sila sa pagitan ng iba pang latak,

Maingat ko silang iniipon upang di nila ako
masusugatan. Saka pinapaubayang maghalo

Sa isang maluwang na sako. Di ko sila inihihiwalay
ayon sa laki, anyo at kulay, gaya ng pagbubukod

Ng lipunan sa tao. Sila na walang buhay
ang bumubuhay nitong binabasurang buhay.

11 November 2008

Sa Carousel Bar

Bawat parokyano'y mangangaso.
Mula sa kasukalan ng dilim
Tahimik siyang magmamasid
Sa mga matitikas na lalaking
Posibleng malalapa ngayong
Humihibo ang sariling laman.
Sa umpisa'y itutuon ang tingin
Sa natitipuhang biktima;
Pagdaka'y bibitagin ng ngiti,
Paaamuin ng sambasong inumin.
Kung sakali mang iilap
Sa pait ng alak ang hinahangad
Di siya lumilikha ng kaluskos
Na maaaring magtataboy
Sa inaasam-asam na bihag.
Mananatili pa rin siyang tahimik
Habang matiyagang ihahanda
Ang Frankong patibong
At dahas na kinukuyom.

10 November 2008

Lubid

Inilagak ako sa isang sulok
Na walang bumibisita maliban
Sa mga kakilalang alikabok.
Sa pag-iisa, isa-isang inuusisa
Ang mga katangiang humuhugis
Sa kabuuan ng aking pagkalubid:
Bawat makintab na hibla'y
Mahigpit ang pagkakasalapid;
Ang tatlong metrong haba'y
May isang libo't-isang saysay;
Ang mala-daliring diyametro'y
Pansilo sa mga payak na damgo.
Kaya di ko ikinamangha minsang
Sa aki'y may paslit na dumampot.
Bulong ko ngayon sa palibot:
May silbi na ang aking eksistensiya
Ngunit nang sa leeg ako'y ipinansabit
Wala akong ibang dalit na nasambit-
Sana ako na lang ang n
a
p
a
t
i
d

Tala: nalathala sa Dagmay (Literary Journal
of the Davao Writers Guild), Hunyo 21, 2009

14 Januar 2008

Ako at ang Syudad

Puta ang turing ko sa syudad
sa mga sandaling kinukumutan
ng kulay abo ang kalangitan.

Nagmemeky-ap ng putlaing ilaw
upang ikubli ang mga bitak at dungis
ng bawat edipisyo, iskinita't kanto.

Nagsusuot ng mga karatulang
bumabakat sa mga panindang
nangangako ng kaluwalhatian.

Nag-iisprey ng nakahihikang pabango
na nagmumula kundi man sa sigarilyo
ay sa humaharurot na mga tambutso.

Naglalasing sa mga himutok at hinaing
ng masangsang na simoy ng hangin
at baradong kanal na walang pumapansin.

Nang-aalok ang kindat ng mga neon lights
ng mura at matataas na deskuwento
sa de-kalidad na masahe at karinyo.

At ako, ang isa sa mga parokyanong
naliliyong nakikipagkalakalan
sa nanlilimahid na lipunan.

tala: nalathala sa Dagmay (Literary Journal
of the Davao Writers Guild), Disyembre 7, 2008

09 Januar 2008

Habang Nag-iisa Sa Warsaw

pinamamahayan ng lumbay
ang puso kong mapagbanyuhay
gayong lubos na pinananabikan
ng aking mga talampakan
na magalugad ang syudad
na kumakalong sa Ilog Vistula,
nadaig yata ng makulimlim
na panahong nakalambong
sa aking ulunan

habang isa-isa na kinikilala
ang mga gusali't iskinita
sa puso ng Stare Miasto
binabati ako ng mga ito
na tila ba mga bulaklak
sa parang kung tagsibol.
ngunit sa aking balintataw
lahat sila ay kay pupusyaw,
wari'y kinukumutan
ng makapal na usok
ng ikalawang digmaang
pandaigdig

kaya magmula ngayon
ayaw ko nang maglakbay
na hindi ka kasabay.

tala: unang nalathala sa Our Own Voice
Literary Ezine, Disyembre 2005

08 Januar 2008

Dapithapon sa Boracay

Sa tuwing dapithapon
naging kawili-wiling tanghalan
ang tila arinang dalampasigan.

Pagbukas ng bulwagan,
nagsasalitan sa pag-awit
ang mga alon, hangin at kuliglig;

upang tiyak na matukoy
ang oras at tagpuan ng dulang
nililikha ng kalikasan,
mababanaagan ang mga bangkang
nagmamadaling pumapalaot
habang ang kulay dalandan na araw
ay dahan-dahang humihimlay
sa mapulang orisonte;

tila mga butil ng kaypinong buhangin
na di kayang bilangin
ang mga tauhang nagsisiganap
sa pangkaraniwang palabas:
mga dayber na tumutuklas
sa yama't ganda ng dagat,
mga matitikas na tinedyer
na nakikipaghabulan sa alon,
mga bakasyunistang hindi mapakali
na sa harap ng kamera'y ngiti nang ngiti,
at iilang mga mangingibig
na taimtim lamang na nagmamasid
sa mga nagaganap sa paligid
ngunit pandamdam ay nagpipiging
nang maluwalhati't tahimik;

at bilang epilogo,
mamaybay sa bukana ng puso
pagkat doon madalas humahapon
ang kasiyahang dulot ng ganitong
mga dapithapon.

07 Januar 2008

Ellis Island

Nagpinta ka
sa lupalop ng aking gunita---
ng mga natuklap na kaban at maleta,
ng mga napudpod na sapatos at sandalyas,
ng mga nasugatan na pantalon at bestida.

Tumugtog ka
sa lupalop ng aking gunita---
ng mga hiyaw ng sanggol na gutom,
ng mga lagapak na interogasyon,
ng mga buntong-hininga ng disilusyon.

Naglilok ka
sa lupalop ng aking gunita---
ng mga nalagutan ng hininga't pag-asa,
ng mga manlalakbay na nakatitig sa kawalan,
ng mga nandarayuhang umaasam ng kaginhawaan.

A, munsik na isla ng Amerika!
pinuno mo ng sanlaksang alaala
itong puso't diwang naglalakbay
na kailanma'y di ko maididiskarga
sa lupalop ng aking gunita.

tala: unang nalathala sa Dagmay (Literary Journal
of the Davao Writers Guild), Disyembre 28, 2008.

Pagdalaw sa Houston

(para kina Archie at Joey)

Walang makasaysayang edipisyo ng syudad
ang nag-iwan ng matingkad na palatandaan
sa lupalop ng aking gunita.
Kundi tanging mabibilog na mukha
ng matalik kong mga kaibigang
may ilang taon na ring di ko nayakap
nang mahigpit sa kanilang mga kaarawan.
O di kaya'y naiabot man lamang ang kamay
sa mga sandaling diwa'y nag-aapuhap
ng katiyakan sa pangingibangbayan.
Kaya nitong muling pagtatagpo
lubos kong kinagiliwan ang gabi-gabi
naming paglatag ng mga nakasalansang
karanasan sa lihim na kilusan at tanghalan.
Minsa'y napabuntong-hininga kami
sa mga kakilala't kasamang pinaslang.
Minsan nama'y biglang napahagikhik
sa mga pag-ibig na di naipahiwatig
sa mga kapwa mandudula sa teatro.
Binagtas na ng aming mga talampakan
ang liku-liko't mabatong disyerto.
Ngunit bumabalik at bumabalik kaming tatlo
sa pagtunton sa mga kalyehon ng nakaraang
kay titingkad ng mga palatandaang iminuhon
ng aming mga di malimot-limot na kahapon.

Ang Iyong Postkard Mula sa Napoli

(para kay E)

Tiningnan ko lamang nang bahagya
Ang postkard na pinadala mo sa akin.
At nanghinayang sa mga sandaling ito
Dahil hindi ko man lang maipahayag
Sa kapirasong kartong dumating
Ang mga agam-agam na nakakawing
Nitong padalus-dalos mong pagbiyahe.
Sana sabay nating napagnilayang
Ang paghibo ng laman kung minsan
Ay kirot na sa isipa'y nananahan.
Gayunpaman, salamat at naalala mo ako
Ngayong inaapuhap mo ang iyong gusto.

Armenya, Anno 1915

Nagdiwang noon ang sangkalupaa't sangkalangitan
Nang hinalinhan ng tagsibol ang mabagsik na taglamig.
Iniabot ng bawat tangkay ang hawak na mga bulaklak
Sa magagarang salagubang na namasyal sa parang;
Ang kawan ng mga ibon na naglakbay sa katimuga'y
Nangagsibalik na sa kani-kanilang pugad na nilisan;
Sa bukid nagsatubig ang bloke-blokeng niyebe't
Tinalunton ang lumuting daan ng mga batis at lawa;
Inilatag ng lupa ang luntiang alpombrang naging
Palaruan ng mga ligaw at maamong kahayupan;
At ang maninipis na ulap ay tinipon ng kalawakan
Bilang pabelyong masisilungan ng sangkatauhan.
Ngunit wala ni isa mang angkan ng Armenyan
Ang dumalo't nakasaksi sa pagdaraos na naganap.
Sa halip, bata at matatanda'y nanaghoy sa kwadra
Habang inaantay ang mga sundalong Ottoman,
Na walang tanging alam at kapuri-puring
Ipinagdiriwang kundi ang pumaslang.

tala: napasama sa antolohiyang 'Spirituality & Healing'
(Ani 34), na nilathala ng Cultural Center of the Phils.,
at nilunsad noong Disyembre 17, 2008.